Kijan pou m prepare m pou yon andoskopi?
Anjeneral, yon andoskopi pa fè mal, men doktè w la ap ba w yon ti kalman oswa yon anestezi. Poutèt sa, ou ta dwe fè aranjman pou yon moun ede w rive lakay ou apre si w kapab.
W ap bezwen evite manje ak bwè pandan plizyè èdtan anvan yon andoskopi. Doktè w la ap di w konbyen tan w ap bezwen rete san manje anvan pwosedi a.
Si w ap fè yon kolonoskopi, w ap bezwen fè yon preparasyon pou trip ou. Doktè w la ap ba w enfòmasyon detaye sou sa w bezwen fè.
Kisa k ap pase pandan yon andoskopi?
Anvan li kòmanse, yo ka ba ou swa yon anestezi lokal oswa jeneral oswa yon kalman pou ede ou detann. Ou ka konnen oswa ou pa konnen sa k ap pase nan moman sa a, epi ou pwobableman p ap sonje anpil bagay.
Doktè a pral mete andoskop la avèk anpil atansyon epi byen egzamine pati y ap egzamine a. Yo ka pran yon echantiyon (byopsi) ou. Yo ka retire kèk tisi malad. Si pwosedi a gen ladan l nenpòt ensizyon (koupe), anjeneral y ap fèmen sa yo ak sutur (pwen).
Ki risk ki genyen nan yon andoskopi?
Chak pwosedi medikal gen kèk risk. Anjeneral, andoskopi yo pa gen anpil danje, men toujou gen yon risk pou:
reyaksyon negatif a sedasyon
senyen
enfeksyon
fè yon twou oswa chire zòn ki egzamine a, tankou pike yon ògàn
Kisa k ap pase apre pwosedi andoskopi mwen an?
Ekip sante w la ap siveye w nan zòn rekiperasyon an jiskaske efè anestezi a oswa sedatif la fini. Si w gen doulè, yo ka ba w medikaman pou soulaje doulè a. Si w te pran sedatif, ou ta dwe fè aranjman pou yon moun mennen w lakay ou apre pwosedi a.
Doktè w la ka diskite sou rezilta tès ou yo epi pran yon randevou pou swivi. Ou ta dwe al wè doktè w imedyatman si w santi nenpòt efè segondè grav. Sa yo enkli lafyèv, doulè grav oswa senyen, oubyen si w gen enkyetid.